بسم الله الرحمن الرحيم
تركيزي
أنا ما جيتش نترشح للرئاسة غير حيث بغيت المنصب. جيت حيث بغيت نخدم ونساهم فأن المغرب يكون أحسن، ومستعد نعطي الوقت والمجهود ديالي كاملين للعبة ولنجاح الدولة.
كنحس أن الرئاسات السابقة ركزات بزاف على الجانب العسكري، وهادشي كان مهم وساعدنا نبنيو أساس عسكري منظم وقوي.
دابا، بما أن الجانب العسكري ولى منظم وعندو أساس قوي، بغيت نركز أكثر على بناء المغرب من الداخل: تحسين النظام، تقوية الاقتصاد، وتنظيم الدولة بشكل أحسن.
وبغيت العلاقة بين الدولة والمواطنين تكون أقرب ومبنية على الشفافية وتكافؤ الفرص: المواطن خاصو يعرف شنو واقع، يقدر يسول، يعطي اقتراحات، ويعرف فين يقدر يساهم.
لهاد الغرض، هادو التزامات واضحة غنخدم عليها:
المناصب بالأحقية والكفاءة: المسؤوليات والتعيينات غاتكون فقط للي كيستحق وعندو التجربة والخدمة فالميدان؛ ما كاينش منطق "صاحبي وصاحبتي" فتدبير شؤون الدولة.
اجتماع أسبوعي كل نهار الأحد مع 6:30: نفتحو فيه نقاش مباشر لمناقشة الأفكار، تقييم طريقة التسيير، والإجابة على تساؤلات الجميع.
الانفتاح على النقد البناء: صدري مفتوح لأي نقد منطقي وبناء كيهدف لمصلحة البلاد والزيادة بها للقدام.
دعم الصحافة: تشجيع كتابة المقالات، خلق حركية إعلامية، وتحفيز الناس اللي كيكتبو وينشرو.
دعم أي واحد باغي يخدم الوطن: أي مواطن عندو رغبة، فكرة، أو مبادرة باغي يساهم بها فالدولة غادي يلقى منا كل الدعم والتشجيع.
الهدف ديالي ماشي غير نقويو الجانب العسكري، ولكن نبنيو دولة أحسن من الداخل كذلك.
بالنسبة للبرتغال
غادي نكملو بنفس الخطة اللي خدامين بها دابا: ماشي ندخلو فمعركة كبيرة ونحاولو نحسمو كلشي مرة وحدة، ولكن نستنزفو الخصم بالتدريج حتى يضعف، ومن بعد نوجهو ليه ضربة قوية فالوقت المناسب.
فالوضع الحالي، هادي هي الخطة الأكثر منطقية، خصوصاً وأننا مقابلين دولة قوية وعندها عدد كبير ديال اللاعبين. الحرب ماشي غير قوة، ولكن حتى صبر، توقيت وتخطيط.
التجربة ديالي
حالياً كنشرف على سعديين، وهي ثالث فرقة عسكرية خدامين عليها، وكنساهم فالتغيير الكبير اللي كنحاولو نديرو فيها، بتنسيق مع الدراري الآخرين.
عندي كذلك علاقات مزيانة مع عدد من قادة الدول ومقابلات ونقاشات دبلوماسية، وهذا عطاني فرصة نفهم أكثر السياسة والعلاقات بين الدول فاللعبة.
وزيد على هادشي، كنت ديما فقلب التنسيق والتواصل المستمر مع الرؤساء السابقين وأعضاء الكونجرس، وهادشي خلاني قريب من كل القرارات والأحداث وفهمت سياسة اللعبة والتسيير ديالها أكثر مع الوقت.
وكوني وزير الخارجية ماشي غير باش يكون عندي منصب فالاسم. حاولت نبين القيمة ديالي ونساهم فالخدمة، وهاد التجربة عطاتي معرفة أكبر بطريقة تعامل الدول والتحالفات.
المغرب محتاجنا كاملين
أنا ما كنقولش أنني نقدر ندير كلشي بوحدي.
المغرب محتاج للجيل القديم والجديد كاملين، وكل واحد عندو دور يقدر يساهم بيه.
أنا جيت باش نخدم، ماشي باش ناخد المنصب.
إلى عطيتوني الثقة، غادي نعطيكم الوقت والمجهود ديالي كاملين باش نخليو المغرب أحسن وأقوى من اللي هو عليه دابا.
🇲🇦 نبنيو المغرب مع بعضياتنا.