" لما تبدأ تعتمد على نفسك "

"قبل ما نبدأ"

بعد فترة انقطاع من المقالات بسبب السفر رجعنا بكلام جديد عن مرحلة بيمر بيها كل إنسان وهي اللحظة الببدأ فيها يعتمد على نفسو ويعرف إنو مستقبله ما مربوط بانتظار الاخرين

"بداية الاعتماد"

في لحظة معينة في الحياة بتكتشف إنو ما كل مرة ح تلقى زول يشيل عنك المسؤولية وما كل مشكلة ح يجي زول يحلها ليك وقتها بتبدأ تفهم إنو لازم تقوم بدورك وتكون سند لنفسك قبل ما تنتظر السند من غيرك

"كبر المسؤولية"

الاعتماد على النفس ما معناه إنك ما تحتاج أي زول ولا إنك تكون قوي طول الوقت المعنى الحقيقي إنك تعرف تتحمل مسؤولية قراراتك وتحاول تصلح أخطاءك وتسعى بدل ما تقعد منتظر الظروف تتغير براها

"المرحلة الصعبة"

أصعب جزء في الاعتماد على النفس إنك مرات بتحس إنك لوحدك وإنو الحمل أكبر منك لكن التجارب دي ذاتها بتبني شخصيتك لأن الإنسان غالبا ما يعرف قوته الحقيقية إلا لما يلقى نفسو قدام مسؤوليات ما كان متوقعها

"ما تنتظر الوقت المثالي"

كتير من الناس بستنوا الظروف المناسبة عشان يبدأوا لكن الحياة نادرا بتديك كل الحاجات جاهزة مرات لازم تبدأ بالمتوفر عندك وتتعلم في الطريق لأن الخبرة ما بتجي من التفكير بس بتجي من المحاولة والمواجهة

"اعرف قيمتك"

لما تعتمد على نفسك بتتعلم إن قيمتك ما مرتبطة برأي الناس فيك ولا بمدحهم ليك بتعرف إنك محتاج تطور نفسك عشان نفسك قبل أي شخص تاني لأن الإنسان البعرف قيمتو ما بسهولة ينكسر من كلام الاخرين

"التوكل والعمل"

في ديننا الاعتماد على النفس ما معناه الاعتماد على القوة الشخصية ونسيان ربنا بالعكس المؤمن يسعى ويأخذ بالأسباب وقلبه متعلق بالله لأن السعي واجب والنتائج بيد الله قال تعالى فإذا عزمت فتوكل على الله

"في النهاية"

رحلة الاعتماد على النفس ما بتبدأ بيوم تكون فيه جاهز تماما غالبا بتبدأ في يوم تضطر فيه تواجه الحياة وتقول أنا ح أعمل البقدر عليه وأتعلم الباقي في الطريق وكل خطوة صعبة بتعدي بيها اليوم ممكن تكون هي السبب البخليك أقوى وأنضج بكرة

،

فلا تخاف من المسؤولية ولا تهرب من التحديات لأنها مرات ما بتجي عشان تكسرنا لكن عشان تطلع من داخلنا شخص ما كنا عارفين إنو موجود

اللهم أعنا على تحمل مسؤولياتنا ووفقنا لما فيه الخير وبارك لنا في أعمارنا وأعمالنا وارزقنا قوة في الطاعة وحكمة في القرارات وتوكلًا صادقًا عليك

اللهم صل وسلم وبارك على نبينا محمد وعلى آله وصحبه أجمعين

،

{والســلام عليــكم}