السياسة الحكيمة
: واش كثرة التحالفات قوة ولا خطأ استراتيجي؟
لاحظت بزاف ديال الدول على طول اليوم كتلقاهم غير يوقعو ف لاتفاقيات تحالف مع دول بعيييييدة عليهم من ناحية مسافة وكذالك من ناحية ميزان القوى
التحالفات والاتفاقيات السياسية معناها قوة ونفوذ، ولكن الحقيقة فبعض الأحيان كتكون العكس تماما أي دولة داخل اللعبة إلا دخلات فـ عشرات التحالفات بلا حساب، كتولي مقيدة وماعندهاش حرية القرار السياسي أو العسكري.
عندنا واحد المثل مغربي كيقول ناقص واحد ناقص مشكلة
نتا كرعيم دولة راك كتمثل شعب كتمشي توقع اتفاق غ حيت تعرض عليك هديك دولة ضاربت مع دولة لي عندك علاقات قوية معاها مثلا اقوى من ديك دولة لي وقعت معاها تحالف طبعا ديك دولة غ تقوليك بيناتنا ميثاق تحالف خاصك اجياريا تدعمها
هنا نتا طحت ف اكبر زلة سياسية غ تبقا فضيحة لك كسياسي مجبر انك تهاجم دولة علاقاتك معاها اقوى حتى من حليفة ديالك
كاين فرق كبير بين أنك تبني تحالف قوي ومفيد، وبين أنك تجمع الحلفاء غير باش يبان عندك النفوذ لأن التحالف الحقيقي خاصو يكون مبني على المصالح المشتركة، الثقة، والتوازن فالقوة أما إلا وليتي كتوقع اتفاقيات مع أي دولة كتجي، غادي تلقى راسك وسط مشاكل ماشي ديالك، وحروب ما مستعدش ليها.
حليف يدخل حرب، يجر معاه الجميع، ومن بعد كتولي الدولة محاصرة اقتصاديا وعسكريا بسبب قرارات ماحسباتهاش مزيان. والأسوأ من هادشي كامل هو ملي كيولي الحليف عبء أكثر من أنه دعم.
السياسة ماشي غير شعارات وصور جماعية بين الدول، السياسة الحقيقية هي تعرف مع من توقف، وعلاش، وفاش. ماشي أي دولة قوية خاصك تتحالف معاها، وماشي أي عدو لعدوك كيولي صديقك.
الحكمة هنا هي أنك تختار عدد محدود من الحلفاء، ولكن يكونو حلفاء عندهم قيمة حقيقية:
دعم عسكري وقت الحاجة.
احترام للاتفاقيات.
استقرار سياسي.
ومصالح مشتركة على المدى البعيد.
حتى الاتفاقيات الاقتصادية والعسكرية خاصها تكون مدروسة. لأن كثرتها كتقدر تدخلك فالتزامات خطيرة، وكتخلي القرار الوطني ضعيف ومشتت.
الدول الذكية و القيادة النابغة هي اللي كتوازن بين الدبلوماسية والاستقلالية. كتخدم مع الحلفاء اللي يقدرو يضيفو قوة حقيقية، وماكتبنيش سياستها غير على المجاملات أو الخوف من العزلة.
وفالأخير، القوة الحقيقية ماشي بعدد التحالفات اللي عندك… القوة الحقيقية هي تكون عندك دولة قادرة توقف على رجليها، وتعرف تختار معاركها وحلفاءها بعقل وحكمة
البوست راه كتبتو مكندق حتى على واحد بيه غ شفت امور ممكن مستقبلا تقدر تخرج على مجهود شعب كامل ويا خوفي من هداك اليوم
