الشرح الوحيد الي هتحتاجه ك مبتدئ

༶•┈┈⛧┈♛ بسم الله الرحمن الرحيم ♛┈⛧┈┈•༶

السلام عليكم، في بدايتك في لعبة وار ايرا مش هتكون فاهم حاجة وهتحس العبة معقدة ومش مفهومة ابدا،
لكن خليني اطمنك، انا كنت زيك وعايز ابشرك العبة تافهة وسهلة جداً، وعشان كده عملت الشرح ده عشان ابسطلك كل حاجة

الأساسيات الي هيتم شرحها

1. طريقة التلفيل
2. السكيلات

3. الحرب
3.1 اضرب فين
3.2 شرح نظام الحرب
3.3 اتضرب بإيه
4. الشركات

4.1 ازاي الشركات بتشتغل، اطورها إزاي؟
4.2 ازاي اختار مكان الشركة

4.3 ازاي اغير المنتج ومكان الشركة
5. الوحدة العسكرية

6. ديسكورد مصر ومقالات مفيدة

صلي عالنبي، ويلا نبدأ شرح أساسيات العبة

المستويات والفلات

لفلك هو اهم حاجة في العبة، وكمبتدئ التلفيل بيكون سهل وفي يوم لو انت ذكي تقدر توصل لفل 10 او تقربله

عشان تعلى في اللفل انت محتاج تخلص المهمات متقسمة لتلت اقسام

كل نوع من المهمات بيديك عدد من ال(XP) وده الي بيعلي الفل
هنسميها نقاط الخبرة عشان لو كتبت إنجليزي وسط العربي مش هتفهم حاجة

1- مهمة يومية 10 نقاط - لو خلصت 7 مهمات هتاخد 100 نقطة
2- مهمة اسبوعية 30 نقاط - لو خلصت 7 مهمات هتاخد 300 نقطة
5- مهمة بداية 50 نقاط - لو خلصت 7 مهمات هتاخد 500 نقطة

انصحك ك بداية تحاول تخلص مهمات البداية بسرعة، لإن اغلبها تافه اوي وسهل
ولازم كل يوم تخلص مهامك، ومتفوتهاش
وكل المهمات بتتعاد يوميًا او أسبوعيًا، إلا اليومية هي مرة واحدة فقط

لو مش فاهم تعمل المهمة ازاي، اضغط على السهم وهيوديك على المكان
ليك محاولة مجانية واحدة تغير المهمة، وانصحك تعملها لو مطلوب تاكل سالمون عشان غالية عليك ك مبتدئ

المهارات او السكيلات

ك مبتدئ اوعى تركز غير على الإقتصاد او الإيكو، لما تحط سكيلاتك تجاهل الحربي او الوار تمامًا، لإن انت لازم تبني اساس قوي تطلع عليه
ومتحاولش تتذاكى وتحط نقطتين تلاتة في الحرب، لا احنا هنزل كل حاجة على سيرفر الديسكورد وتوزيعة السكيلات، لكن اول هدف لك هو 6 مصانع لفل 6

وهنا شرح لبارات العبة

1- الصحة او الهيلث 💚
ودي الي بتخليك تعرف تضرب في الحروب، وكل ضربة من غير دروع او بوت بتنقصك 10 من الصحة

2- الأكل 🍴

العيش 10% من صحتك 🥖
الحمة او الستيك 15% من صحتك 🥩
السمك او السالمون 20% من صحتك 🍣

الأكل بيرجع من صحتك ولكن بنسبة من ماكس صحتك
يعني مثلا في حالتي لو اكلت عيش هرجع 10 من صحتي وهكون 90، ومتاكلش غير عيش عشان الباقي غالي وانت مش هتحتاجه

3- الطاقة او الشغل ⚡
دي الي بتشتغل بيها عند الناس وتقدر تشتغل كام مرة

4- ريادة الأعمال او الشغل لنفسك في شركاتك 💡
مفيهاش رغي كتير، بتشتغل في شركتك



وعشان تعمل اي فعل، محتاج 10 من البار ده عالأقل، الا في حالة الهنغر هتحتاج 1 فقط

لو ملاحظ جنب البار هتلاقي رقم، كل اول ساعة(في حالتي بعد 11 دقيقة) بيزداد البار ده بنسبة 10% وبعد 10 ساعات(لو مفضي كل البارات) كل باراتك هتكون كاملة

وهنا تقدر تعرف ان كل الي انت محتاجة لو مش فاضي، تخش كل كام ساعة تضغط وتخلص مهامك وبس كده

باقي سكيلات الإقتصاد

هنا باقي سكيلاتك، عايزك تجاهل تماما الحربي ومتزودش فيه نقطه وتنزل على تحت علطول

احنا شرحنا اول اتنين بالفعل فا هشرح الباقي

1- الإنتاج 🔨
ودي بتحدد كل ضغطة في لشغل او ريادة الأعمال بتطلع كام، في حالتي 34 ولكن في الشغل في عوامل تانية

2- الشركات 🏭
عدد الشركات المسموح تبنيها، وك بداية بيكون عندك شركتين مجاني

3- العمال 🤵‍♂️
عدد العمال المسموح تشغلهم، وك بداية بتقدر تشغل 4 مجاني

طبعا اوعى تشغل عمال ك مبتدئ، وتوزيعة المهارات هتنزل في الديسكورد عشان تفهمها كويس، ولكن الأهم تجاهل الحربي ركز انك توصل 6 مصانع لفل 6 في اسرع وقت

الحرب (مهم جدًا)

اساس العبة، والي العبة اتعملت عشانه، نظام المعارك في العبة

3.1 اضرب فين

هتلاقي في شريط تحت فيه كل معارك العالم، انت مش هتضرب في اي معركة، هتلاقي معارك فوقها علم مصر، اضرب معاها دايمًا وسيبك من
الباقي
لون المعركة بيدل على اهميتها + بونص الدامج الي هتاخده، والأفضل دايما انك تضرب مع الأحمر، ولكن متهتمش اوي بالحروب ك مبتدئ هو انت خلص مهماتك وخلاص عشان كده كده اول ما تبقى جاهز هنخليك تحارب
ولكن خليني اعرفك فرق الوان الأوردر

• الأخضر - 5% اقل اهمية وبيكلف فلوس قليلة

• الأصفر - 10% متوسط الأهمية وضعف سعر الأخضر

• الأحمر - 15% الأولوية الأولى وضعف سعر الأصفر

الدولة والوحدة العسكرية يعرفو يعملو اوردر، واوردر الدولة ك سعره بيزداد مع توسعها وعدد سكانها ولفلاتهم

3.2 شرح نظام المعركة

هتخش على اي باتل فوقيها علم مصر زي ما شرحت فوق
مينفعش تضرب غير مع حانب واحد، طيب اضرب مع مين؟
هتلاقي تحت علم مصر وجنبه جملة، ايوا اضرب مع الجانب ده
هنا لو واخد بالك سولفينيا بتهاجم النمسا، هل هتفرق؟ اه لكن مش مهم دلوقتي

1- عشان تكسب اي معركة محتاج تكسب راوندين من اصل تلاتة

2- عشان تكسب اي راوند محتاج تاخد 300 ارض
3- كل راوند متكونة من مجموعة من ال ticks
كل تيك بتديك عدد من الأراضي، بيزيد على حسب مجموع الأراضي من الطرفين
4- كل تيك بتحتاج دقيقتين عشان تخلص
طب ازاي انا بكسب ال تيك؟ عن طريق ان في اخر الراوند تكون انت الي عامل دامج اكتر والبار بتاعك الي غالب، في الحالة دي نمسا الي هتكسب التيك دي

يعني انت تقدر تقول كل معركة لازم تكسب فيها راوندين، كل راوند فيه راوندات اصغر بتسمى تيك، كل تيك بتديك مجموعة من الأراضي، لازم تجمع 300 ارض الأول عشان تكسب

عدد الأراضي الي بتكسبها في التيك بيزيد مع زيادة مجموع الأراضي من الطرفين، ودي صورة بتوضحها

3.3 تضرب بإيه

لازم لازم ك مبتدئ متضيعش فلوسك ابدًا على السلاح، اضرب برمادي او حتى من غير سلاح خالص طلاما هتخلص المهام يبقا تمام، صدقني اي سنايبر او رشاش او دبابة لو بعتها وطورت مصانعك هتفيدك اكتر بكتير، لكن لو تجاهلت النصيحة دي ومبعتش الأسلحة الي تطلعلك مستواك هيتآخر
ومتكلش غير العيش، الا لو مهمة طلبت تاكل لحمة تمام، وزي ما قلت ابقا اعمل نرد لو طلب تاكل سمك

الشركات

اهم حاجة ليك ك مبتدئ، ركز عليها واستثمر كل وقتك ك مبتدئ عشان تفهمها وتفهم السوق وازاي يكون مكسبك عالي
هدفك الأول ك مبتدئ 6 مصانع لفل 6، ولكن حاليًا خليني اشرحلك الشركات

4.1 ازاي الشركات بتشتغل

🟡 يونص الشركات، ده بيزود إنتاج شركتك في الساعة والعامل وشغلك في شركتك ، بيتحدد على حسب موارد الدولة والحزب بتاع الدولة، لازم تختار اعلى دولة في البونص مش اي دولة

🔴الضرايب، ودي بتتاخدش منك لأ لكن لو شغلت عمال المرتب الي هتديه للعامل هيتخصم منه الرقم ده، يعني لو مشغل حد ب 10 جنية هو هياخد 8.9
والفرق ده بيروح للدولة ك ضرايب بتستفاد بيه

⚪ده إنتاج الشركة في الساعة، وبيزداد على حسب بونص الدولة ولفل المحرك او ال Automated Engine
وهشرح تطويرات المصانع بالتفصيل في النقطة الجاية

🟣ده الشغل في شركتك او ريادة الأعمال، شرحناها فوق

🟠هنا هتضغط وتاخد الإنتاج بتاعك وتروح تبيعه


4.2 تطوير الشركات

بتضغط على صورة الشركة او المنتج وهتنزل تحت ويطلعلك ده

1- AE (Automated engine)
هو ده لفل المصنع، متهتمش غير بيه وتطورو على حسب الخطة الي هتكون محطوطة ليك
ده بيزود إنتاجك في الساعة، وزي ما قلنا بيتآثر ب اللفل وبونص الدولة

2- المخزن
اوعى تطوره او تهتم بيه الا لو هتشغل عمال، لكن فكرته انه بيزود مساحة شركتك عشان لو اتملت مش هتعرف تنتج ولا العامل هيعرف يتشغل

3- معلومة إضافية
انت كل نقطة في الحديد هتطلعلك حديدة، في منتجات زي الستيل لا بتحتاج 10 نقاط إنتاج مع 10 حديدة عشان تطلع 1 ستيل
وعلى كل منتج بتختلف الحسبة

4.3 إختيار المنتج ومكان الشركة الشركة

مكانالشركة هو ابسط حاجة، هو الموقع هيطلعلك الأفضل الأماكن
بس خلي بالك، اختار ارض اصلية للبلد ، يعني في الححالة دي اختار الوادي الجديد او عاصمة مصر عشان ده افضل للدولة

اختار منتج إيه عشان أنتجه؟
بص فكرة المقال شرح ميكانيزم العبة، لكن في مقالات تانية هتشرح تختار ايه في الديسكورد وهنا
ولكن خليك في الاربعة الأساسيين

• حديد

• ستيل

• حجر جيري او ليمستون

• كونكريت

دول المعروفين والي الطلب عليهم عالي دايمًا، اكيد تقدر تغير ولكن ابعد عن ورق الشجر والحباية عشان دول اسوا حاجة للمبتدئ، والأربعة دول الأكثر امانًا نسبيًا


4.4 ازاي اغير المكان والمنتج

دي بسيطة وعبيطة

1- هتغير مكان الشركة، وزي ما علمتك فوق اختار المكان الجديد

2- تغيير المنتج

الوحدة العسكرية (MU)

الوحدة اهم حاجة للحرب، وعشان تدخلها لازم تتواصل مع وزارة الدفاع ( حاليا انا وزير الدفاع) او مساعديه زي
القائد https://app.warera.io/user/69cec6c2d896c6e1b10c6f18
العمدة https://app.warera.io/user/69d32464e056354ca8300837
العمدة https://app.warera.io/user/69d3005e9f38d300d5a4e123
هذا الوضع حاليًا ومستقبلًا ممكن يتغير

1- التبرع للوحدة، دي اهم حاجة ولازم يوميًا تتبرع ليها عشان تكاليف الوحدة غالية جدًا ولازم تساعد الوزارة عشان نقوي الجيش اكتر

2- سمعة الوحدة، ودي بتزداد من العقود لو خلصتها ولكنها غير مهمة

3- مساعدة الاعضاء، ودي بتزود هيلث صاحبك 2 ومش بتنقصك اي حاجة

4- نفس الكلام بس هنا انت الي بتطلب المساعدة وهتاخد 10 هيلث لو 5 ساعدوك

5- هنا تكمن اهمية الوحدة، وهي انها بتزود ضررك 20% وده رقم كبير اوي، لكن ده بيستهلك كل ساعة 10 براميل يعني يوميًا 240 برميل وبتختلف على حسب لفل ال HQ (headquarters)
وعشان تلفله اساسا بتدفع ستيل وسعر اخر تطويرة حاليا الف جنية

6- المساحة، ودي عدد الناس الي يقدرو يخشو الوحدة كل لفل بيزودك 5 والماكس 25 واخر لفل بيكلفك 800 جنية

طبعا زي ما انت واخد بالك تكلفة الوحدة عالية اوي، يمكن عشان اوصل للمستوى ده نحتاج 5 الاف او اكتر وبعدها سيولة للاوردرات والبراميل، لكن بالتبرع اليومي قدرنا نمكس وحدات كتيرة، بدأنا من اتنين فقط حاليا اكتر من 10 ماكس

حابب اشكر بس عشان عمل نص وحدات مصر ومكسها

ديسكورد مصر ومقالات مفيدة

كل الي انت قرأته ده شرح للجيم بلاي او ميكانيزم العبة، لكن فيه لسا حاجات كتير انت لازم تعرفها تانية
وهنا لازم تعرف ان 90% من العبة دي مبني على سيرفرات الديسكورد، العبة ليها جانب علاقات وتحالفات وشروحات وستاف خارجية ودفاع وإقتصاد، وميمز
واغلبه بيتم عن طريق الديسكورد، واغلب اسئلتك يفضل تكون على ديسكورد عشان يتم مساعدتك

سيرفر مصر
https://discord.com/invite/egypt-warera-io-1441434769190817825

مقالات مفيدة اوي لازم تقرأها


https://app.warera.io/article/6a21a1651aa289ec1919a204
https://app.warera.io/article/6a2065369b643b506bb4bf59
https://app.warera.io/article/6a2089f49b6366f558c008c5


لو عجبك المقال اعمل تيب انا بقالي يومين بكتب