من حوالي شهرين ونص شوفت بوست على فيسبوك في جروب اسمه "Games Mix" بيتكلم عن لعبة جديدة اسمها WarEra. شكل اللعبة والخريطة ومساحة مصر شدوني إني أجربها، خصوصًا بعد ما عرفت إنها لعبة اجتماعية وليها مجتمع على ديسكورد.
جربت اللعبة وعجبتني جدًا.
عجبني فيها نظام المصانع والسوق والتجارة، وإنك تقدر تبقى صاحب عمل خاص وليك دخل مستقل تقدر تكون منه ثروة. وعجبني كمان إنها بتحسسك إنك عايش في دولة حقيقية فيها رئيس ونائب ووزراء وكونجرس.
لكن أكتر حاجة عجبتني بجد كانت سيرفر مصر على ديسكورد.
كان مليان ناس دمها خفيف، ناس اجتماعية، والسيرفر كله هزار وفعاليات وألعاب. وكان ممتع جدًا، خصوصًا بعد ما يوسف أفندي نجح وأدى مساحة أكبر للحرية داخل السيرفر.
صاحبت ناس كتير هناك، ناس أقل ما يقال عنهم إنهم ميم لوردات، والكلام معاهم كان ممتع فعلًا. ولو بدأت أذكر أسماء مش هخلص، لكن هما عارفين نفسهم.
كانا عاملين طعم خاص للسيرفر، وكانت الدنيا جميلة.
وزي أي مجتمع مصري، كان فيه ميمز وضحك وترول. وكلنا عارفين إن المصريين معروفين بخفة الدم والهزار. وطبعًا الشتيمة كان ليها حدود، مش إهانة لشخص أو تقليل منه، لكن كانت بتستخدم أحيانًا في إطار الميمز والهزار بين الناس اللي متعودة على كده.
دي ثقافة شعبنا اي حد عارف المصريين دايما بيدخلو الفاظ في كلامهم من باب الهزار او الترول
لحد ما ظهر مجموعة ناس انا حاططهم في تصنيف مش هقدر اقول اسمه عشان المقال ميتحذفش
الناس دي مش قادر افهم هما بوتات ولا ذكاء اصطناعي ولا ايه بالظبط
الناس دي كان هدفها تخلي اللعبه ممله عايزين يحولو السيرفر لسجن عايزينه يبقى صارم جدا وممنوع الميمز والهزار والترول، عايزين ينهو علي ثقافة شعب كامل، وخلينا نسمي فكرتهم دي "التعقيم".
ومن أشهر المؤيدين للفكرة دي كان كريتوس ومجموعة تانية من الناس. مش لازم اذكر اسمهم
أنا شخصيًا داخل اللعبة عشان أرفه عن نفسي شوية، أهزر وأضحك وألعب مع الشباب. مش داخل عشان أحس إني موظف في بيئة شغل رسمية طول الوقت. الواحد أصلًا في حياته اليومية بيشوف ما فيه الكفاية من ضغوط. وبيدور علي حاجه يسلي نفسه بيها مش حاجه تضغطه اكتر
المهم إن الأفكار دي كانت مجرد آراء لفترة طويلة، لكن بعد وصول كريتوس للحكم بدأت تتطبق بشكل أكبر، وبقى التعامل بيعتمد على التايم أوت والطرد والعقوبات بشكل مستمر.
وبسبب الأجواء دي، ناس كتير سابت مصر وراحت دول تانية. ناس من أقدم وأهم الشخصيات اللي ساهمت في بناء مصر داخل اللعبة، زي أبو عامر وموستر وإياد وأفندي وغيرهم كتير. محتاج مقال كامل عشان اقدر اذكر انجازات الناس دي
وكمان الناس اللي كنت أعرفها وأستمتع بالكلام معاها، معظمهم خرج من سرفر مصر والباقي بطل يتفاعل.
تقريبا السرفر شبه مات .
فضلت أنا وكام شخص مكملين على أمل إن الوضع يتغير مع الوقت، لكن بصراحة بقيت حاسس إن الموضوع بقى صعب.
وأحب أوضح إن المودريتورز في السيرفر بيقوموا بشغلهم بشكل محترم جدًا، وبفضلهم المشاكل قلت بشكل كبير.
لكن مشكلتي كانت مع بعض الاطفال (مش تقليل منهم هما بجد اطفال اكبرهم مش مكمل 15 سنه) معاهم صلاحيات و بيطبقو فكرت (التعقيم بالحرف الواحد) وبيتعاملوا مع أي كلام أو ميم أو هزار على إنه مخالفة تستحق الحذف أو التايم أوت.
بقيت حاسس إن مساحة الهزار والميمز اللي كانت موجودة زمان اختفت بشكل كبير. بالزات بعد ما واحد اسمه كالورس اخد رول ادمن و دا زود الوضع سوء
انا مش بتكلم علي مشكله شخصيه انا بتكلم عن مشكله عامه بتواجه الكل تقريبا
وفي النهاية، بعد تفكير طويل، قررت إني أسيب سيرفر مصر نهائي.
بعد ما كان من أحب السيرفرات لقلبي، للأسف بقى من أقل الأماكن اللي بستمتع بالتواجد فيها.
فحبيت أوضح قراري للناس اللي تعرفني.
وأي حد محتاجني أو عايز يتواصل معايا، يكلمني خاص.
وشكرًا للجميع.