السلام عليكم ورحمة الله وبركاته
اي شخص مستواه تحت ال10 لزم يقرى الشرح كامل
في البداية انحب انوض ان اللعبة هذي لعبة نفس طويل تحتاج استمرارية حتى تكون نفسك ، و هذي اللعبة لعبة جماعية مش لعبة فردية ، فمنالمستحيل انك تقدر ادير الفرق فيها وحدك .
________________________
هذي المرة شرح لبداية اللعبة و كيف تاسس اقتصاد قوي للمستقبل (حجر الاساس )
و باذن الله رح يكون في شرح لادارة المال و الاقتصاد الفترة الجاية
________________________
نبداء على بركة الله
في بداية اللعبة بتركز ع حاجتين الاولى بناء الشركات التانية تطويرهم.
يعني موضوعك شركات.
تو نتكلمو على توزيع المهارات اولا حاجة ممنوع قطعًا حطان النقاط في المجال الحربي نقطة انتهى.
وين تحط نقاطك!!!
توزيع المهارات مع كل مستوى تحط نقاطك في مكان على حسب الاولوية و الاهم كالاتي
الطاقة مبدائياً 60 و بعدين زيدها ل 90 او 100 و وقف
و بعدها الانتاج وصله طول ل 19 و بعدين وصله ل 25 قبل ما تكمل في الطاقة لانه ينفعك من الجيهتين خير من الطاقة
و بعدين الشركات
ما نبيش انكثر كلام فيه موضوع الشركات لكن لما توصل لفل 15 ضروري يكونو عندك 5 شركات يعني بين المستوى و المستوى تحط نقاط فيالشركات
و بعدها ريادة الاعمال هذي في البداية ما تستحقهاش هلبا قبل مستوى 15 خليها على 40 و معش اتزيدها
قبل مستوى 15 ما تحطش حتى نقطة في التوضيف
_____________________
الشركات
اول شركة لازم تكون مادة خام و ياريت تسئل بيش يقولولك ع البونص و اي مادة انتجها اعلى في الفترة هذي
تاني شركة نفس المادة الخام الاولى
شن وضيفتهم الشركات هذم يدخلو عليك الفلوس المادة لتنتجها بيعها كلها ما تخلي شي
و بعدين اشري بومشي تجهيز لشركة الثالثة
الشركة الثالثة منتج نهائي( مثلا شركاتي الاتنين حجر جيري اندير شركة بومشي )
اهني نوقفو بناء شركات شوي ، شن بنديرو
نبدو انبيعو في المنتج و نشرو حديد و بعدين انطورو المحرك الالي لشركات ال 3 شركات يوصل المستوى متعهم 3
و بعدين نبنو الشركة الرابعة و تكون نفس المادة الخام
و نرجعو لتطوير الشركات مرة تانية تحاول توصلهم مستوى 4 كلهم و بعدين تبدا تخطط انك تبني الشركة الخامسة و تكون نفس المنتج
__________________________
الزبدة من الموضوع كله
العمل الذاتي ( ريادة الاعمال ) هذي بعد ما يبدو عندك 3 شركات بتخدم على المنتج لانه شركات المادة الخام تنتج و انت تصنع المنتج النهائي واتبيعه و مرة مرة لما تنقص المادة الخام اخدم في المادة الخام
هدف من هذا كله
تجميع فلوس
صرفهم على بومشي و فولاذ
تطوير شركات
____________________
العتاد اضرب بعتاد رصاصي حتى انا نضرب بيه لتو ما تقولش كيف
الصناديق افتحهم ما تبيعهمش و كل ما تجمع كل ما خير
طلعلك عتاد ازرق ما تستخدماش الاخظر ما تستخدماش الا بعد مستوى 15
____________________
هذي كبداية و بعدين مع الهدرزة تزيد تفهم اكثر تعرف تتصرف اكثر
و اهم شي الشركات طورهم كان ع الحرب تو تحارب
كلام هلبا و اي شخص عنده راي او تصحيح لكلامي يكتب في التعليقات
المرة الجاية نتكلملكم ع التوضيف عارف روحي نكتب هلبا !!!!!!
و السلام عليكم ورحمة الله وبركاته