لو بدأت اللعبة النهارده.. ده اللي كنت أتمنى حد يقولهولي

حبيت أشارك تجربتي يمكن تفيد أي حد جديد في اللعبة.

أنا بدأت بمصنع واحد أوتوماتيك لفل 1، والحمد لله دلوقتي وصلت لـ 10 مصانع، منهم 5 مصانع أوتوماتيك لفل 6، ولسه مكمل في الباقي.

في البداية كنت بغلط كتير، وأكبر غلطة عملتها كانت إني أوظف ناس بدري. بعد ما جربت فهمت إن التوظيف في البداية ملوش أي لازمة، بالعكس بيخسرك أكتر ما بيفيدك.

الاستراتيجية اللي مشت معايا كويس إني ركزت على الحديد والفولاذ لحد ما حققت اكتفاء ذاتي منهم. بقيت أستخدم الفولاذ في تطوير مصانعي، وأشتغل عند الناس عشان أجمع فلوس. ولما الفلوس تكمل أشتري بيها الطوب للمصنع اللي بعده. وبكده على ما أكون خلصت تطوير المصنع الحالي، أكون جمعت تكلفة المصنع الجديد.

لحد دلوقتي مش مشغل عندي أي حد، وبجمع يوميًا أكتر من 150 فولاذ. يعني كل يومين تقريبًا بقدر أطلع مصنع جديد لفل 6.

نصيحتي لأي حد لسه بادئ:

• دور على شغل دخله كويس.

• اعمل مصنع حديد ومصنع فولاذ بدري عشان تحقق اكتفاء ذاتي.

• خلي الـ Production Points عندك فوق 30.

• لفّل مصانعك بالتساوي، متخليش مصنع لفل 6 وفيه مصانع عندك لسه 2 أو 3.

• لو هتوصل لفل 4، وصل كل المصانع لفل 4 الأول وبعدها ابدأ اطلعهم لفل 5 وهكذا.

• ومتوظفش حد في البداية، اصبر شوية وهتلاقي الفرق بنفسك.

أنا بإذن الله خلال شهرين تقريبًا ناوي أوصل لـ 12 مصنع وأخليهم كلهم حوالي لفل 7.

آسف على الإطالة، لكن حبيت أشارك تجربتي يمكن تفيد حد جديد وتوفر عليه أخطاء كتير أنا وقعت فيها.