هل التعليم براهو كفاية عشان تنجح؟

! صبــَاخ الخيـر !

"قبل ان نبدأ"

خلينا نتفق من البداية إنو الكلام دا ما تقليل من قيمة التعليم ولا دعوة لترك الدراسة بالعكس التعليم من أهم الحاجات البتبني الإنسان لكن السؤال الحقيقي هل الشهادة وحدها كافية عشان تخليك تنجح في الحياة؟

"التعليم أساس مهم"

التعليم بيديك معرفة وطريقة تفكير وبيفتح ليك أبواب ممكن ما كانت ح تفتح بدون علم لكن المشكلة بتحصل لما نختصر النجاح كله في شهادة ونفتكر إنو مجرد إنك اتخرجت معناهو إنك ضمنت مستقبلك

"الشهادة ما بتشتغل مكانك"

ممكن تكون عندك شهادة ممتازة لكن ما عندك مهارة تتعامل بيها مع الناس وما بتعرف تحل المشاكل وما عندك قدرة تتعلم حاجات جديدة وممكن زول تاني شهادتو أقل منك لكن عندو مهارات وخبرة وانضباط خلتو ينجح أسرع منك الشهادة ممكن تفتح الباب لكن ما بتضمن ليك إنك تعرف تمشي بعد ما تدخل

"السوق داير أكتر من الورق"

في الحياة العملية الناس ما بتسألك بس درست وين واتخرجت متين في النهاية في سؤال أهم وهو انت بتقدر تعمل شنو؟ هل عندك مهارة؟ هل بتعرف تتصرف تحت الضغط؟ هل بتقدر تتعلم بسرعة؟ هل بتعرف تتواصل مع الناس؟ وهل ممكن تعتمد عليك؟ دي حاجات ما كل الكتب والشهادات بتعلمها ليك

"لكن ما تقلل من التعليم"

وبرضو لازم نكون عادلين التعليم ما شيء زائد ممكن تستغنى عنو بسهولة في مجالات كثيرة الشهادة شرط أساسي وما ممكن تتعلم الطب أو الهندسة أو الطيران مثلا بمجرد إنك شاطر وبتتعلم براسك العلم المنظم مهم جدا لكن حتى في المجالات دي النجاح الحقيقي محتاج أكتر من

الورق

"التجربة مدرسة تانية"

في حاجات ما بتتعلمها من المحاضرات بتتعلمها لما تشتغل وتغلط وتتعامل مع الزبائن وتواجه مشكلة وما تلقى زول يحلها ليك التجربة بتعلمك حاجات مختلفة تماما عن الدراسة وبتخليك تعرف كيف تستخدم المعرفة البتعلمتها في الواقع

"المهارة بتفرق"

ممكن يكون عندك تخصص ممتاز لكن لو ما عندك مهارات إضافية حتكون فرصك محدودة اتعلم لغة اتعلم استخدام التكنولوجيا اتعلم التواصل والتفاوض وإدارة الوقت وحل المشاكل وكل مهارة بتضيفها لنفسك ممكن تكون سبب في فرصة ما كنت متوقعها

"النجاح ما عندو وصفة واحدة"

في زول نجاحو جاء عن طريق الجامعة وفي زول عن طريق التجارة وفي زول بدأ من مهنة بسيطة وطوّر نفسو وفي زول جمع بين الدراسة والشغل والتعلم الذاتي عشان كدا ما مفروض نقول إنو في طريق واحد للنجاح لكن المفروض تسأل نفسك الطريق البناسب ظروفك وقدراتك شنو

"المشكلة ما في التعليم"

المشكلة لما نخلي التعليم نهاية الرحلة بدل ما يكون بدايتها تتخرج وتفتكر إنو خلاص انتهى دورك في التعلم بينما العالم ذاتو بتغير كل يوم والمهارات البتجيب ليك فرصة اليوم ممكن بعد سنوات تحتاج تطورها أو تستبدلها

"الزيــت"

التعليم مهم لكن ما كفاية لوحدو والشهادة ممكن تكون مفتاح لكن المفتاح براهو ما ببني ليك البيت النجاح محتاج علم ومهارة وتجربة وصبر وانضباط وقدرة على التكيف والأهم إنك ما توقف تعلم لمجرد إنك استلمت شهادة

،

وفي النهاية ما تسأل نفسك بس ح أدرس شنو اسأل نفسك كمان ح أتعلم شنو وح أقدر أقدم شنو وح أطور نفسي كيف لأنو المستقبل غالبا ما بيميل للشخص العندو أكبر عدد من الشهادات بس بيميل للشخص البعرف يحول العلم البتعلمو إلى شيء حقيقي ومفيد

اللهم علمنا ما ينفعنا وانفعنا بما علمتنا وزدنا علما ووفقنا لما تحب وترضى واجعل علمنا حجة لنا لا علينا وبارك لنا في أوقاتنا وأعمالنا وأرزاقنا

،

اللهم صل وسلم وبارك على نبينا محمد وعلى آله وصحبه أجمعين

،

{والســلام عليكــم}