"أكبر كذبة صدقناها عن عمر العشرين"

"ما تتبرع اللايك يكفي "

"تنبيــه"

المقال طويل شوية لكن الكلام دا مهم لأي زول داخل العشرينات لأن العمر دا مرات بخليك تحس إنك لازم تكون وصلت قبل ما تكون حتى عرفت الطريق

---

"أكبر كذبة"

أكبر كذبة صدقناها عن عمر العشرين إنو لازم تكون عارف انت داير شنو ولازم تكون بدأت تحقق أحلامك ولازم يكون عندك شغل وفلوس ومستقبل واضح وكل ما تشوف زول في عمرك سبقك في حاجة تبدأ تسأل نفسك هو أنا متأخر ليه والحقيقة إنو العشرين ما شهادة نجاح ولا موعد نهائي للحياة

"ما لازم تعرف"

في العشرين ممكن تبدأ طريق وبعد فترة تكتشف إنو ما طريقك وممكن تدرس حاجة وتلقى نفسك ما حاببها وممكن تدخل شغل وتطلع منو وممكن تغير حلمك أكتر من مرة ودا ما معناهو إنك فشلت بالعكس دي مرحلة طبيعية جدا لاكتشاف نفسك

"السوشيال ميديا"

زول عمره 21 سنة فاتح مشروع وزول سافر وزول اشترى عربية وزول اتخرج وزول اتزوج وزول بقى مشهور وانت قاعد بتشوف كل دا وبتحس إنك واقف مكانك لكن المشكلة إنك شايف النتيجة وما شايف القصة كاملة ما شايف التعب والظروف والدعم والفرص وانت بتقارن بداية قصتك بمنتصف قصة زول تاني

"العشرينات ما سباق"

في زول ببدأ بدري وفي زول بحتاج وقت أطول وفي زول ممكن يغير حياتو بالكامل بعد التلاتين ودا ما معناهو إنو ضيع حياتو النجاح ما عندو عمر محدد وما في قانون بقول إنك لو ما حققت حاجة معينة قبل عمر معين خلاص انتهيت

"ما تضيع وقتك"

كونك ما مطالب تكون ناجح في العشرين ما معناهو تضيع العشرينات كلها اتعلم مهارة طور لغتك اهتم بصحتك اشتغل لو قدرت ادخر حتى لو مبلغ بسيط اقرأ جرب أغلط واتعلم لأنك ما محتاج تكون وصلت عشان تبدأ لكن محتاج تبدأ عشان تصل

"مستقبلك ما واضح"

يمكن هسي ما عارف ح تكون وين بعد خمس سنين ويمكن حتى حلمك الحالي يتغير ودا طبيعي ما مطلوب منك تعرف كل تفاصيل حياتك المطلوب تعرف الخطوة الجاية وتمشيها وبعدها بتظهر ليك الخطوة البعدها مرات الطريق ما بيوضح إلا بعد ما تبدأ تمشي

"انت ما متأخر"

لو انت في العشرين ولسه محتار ولسه ما عندك شغل ثابت ولسه ما حققت الحلم البتتمناه ولسه بتحاول تبدأ من الصفر ما تخلي دا يخليك تحتقر نفسك انت لسه عندك مساحة كبيرة للتجربة والتغيير والبناء لكن في نفس الوقت ما تخلي فكرة إنك صغير تكون عذر لتضييع سنينك لأن الزمن ذاتو ما برجع

"ابني نفسك"

العشرينات ما مفروض تكون مرحلة تثبت فيها للناس إنك ناجح مفروض تكون مرحلة تبني فيها الزول البقدر ينجح بعدين اتعلم كيف تقوم بعد الوقعة وكيف تتقبل إنك غلطت وكيف تغير طريقك بدون ما تعتبر نفسك فاشل وكيف تشتغل على نفسك حتى في الأيام البتحس فيها إنو ما في نتيجة ظاهرة

"انت لسه في البداية "

يمكن أكبر كذبة صدقناها عن عمر العشرين إنو لازم نكون وصلنا والحقيقة إنو العشرينات غالبا ما مرحلة وصول دي مرحلة بناء فما تستعجل حياتك وما تقارن بدايتك بنهاية غيرك وما تخلي الخوف من التأخر يمنعك من البداية امش براحتك لكن امش اتأخر شوية لكن ما توقف غير طريقك لو اكتشفت إنو غلط وابدأ من جديد لو احتجت لأنك ما متأخر انت لسه في بداية الحكاية

"خاتمــه"

في عمر العشرين ممكن الإنسان يكون شايل هم المستقبل وخايف من التأخير ومحتار في الطريق لكن المؤمن بعرف إنو رزقو وأيامو ومستقبلو كلها بيد الله وإنو السعي علينا والنتيجة على ربنا قال تعالى وعلى الله فليتوكل المؤمنون فاشتغل على نفسك واسعى في الأرض واتعلم واجتهد وما تيأس لو اتأخر عليك شيء لأن الله ما بيضيع تعب عبده وما دام قلبك متعلق بيه فخليك مطمئن وارجع ليه كل ما تعبت

وكل ما احتجت وكل ما ما عرفت تمشي وين

اللهم بارك لنا في أعمارنا وشبابنا واهدنا لأحسن الطرق واصرف عنا السوء والفتن وارزقنا علما نافعا ورزقا طيبا وعملا صالحا وقلبا متعلقا بك اللهم اجعل شبابنا في طاعتك وأعمارنا عامرة بما يرضيك واكتب لنا في مستقبلنا خيرا مما نتمنى واغفر لنا ما مضى وبارك لنا فيما هو آت

اللهم صل وسلم وبارك على نبينا محمد وعلى آله وصحبه أجمعين

{والســلام عليكـم}