السلام عليكم ابطال المغرب فهاد اللعبة الاسطورية واخوة السلاح في كل الجبهات
الاغلبية ديال اللاعبين كيسحاب ليهم بلي السر ديال اللعبة هو شكون عندو مستوى طالع ولا شكون كيضرب ضرر كثر
ولكن الواقع لي عشناه فالحروب لي دازت هو ان دول كبيرة وتحالفات عملاقة طاحت حيت ما عندهاش تكتيك ودول بحالنا قدرات تصمد وتربح حيت كنا متحدين وكنلعبو بالعقل
هنا فين كيدخل كتاب فن الحرب ديال القائد العسكري سون تزو هاد الكتاب لي تكتب هادي الفين وخمسمية عام بحال يلا تكتب خصيصا للعبة هاد السيد حط السر الكبير ديال الحروب والسياسة والاقتصاد
اللعبة ديالنا ماشي غير ضرب فساحة المعركة اللعبة فيها مواطنة وانتاج وشركات وفلوس واحزاب ومقالات فجريدة الدولة وحرب نفسية وجواسيس فتطبيق التواصل ويلا فهمتي هادشي غتولي لاعب واعر واخا يكون المستوى ديالك باقي صغير
القاعدة الاولى لي غنبداو بيها اليوم من الكتاب كتقول الجيش المنتصر كيربح فالمخططات ديالو عاد كيمشي للحرب والجيش المنهزم كيمشي للحرب عاد كيقلب كيفاش يربح
شنو كيعني هادشي فاللعبة كيعني بلي المعركة كتربح فالتنسيق والخطط و فالشركات بانتاج الحديد والاسلحة و فالصحافة بالمقالات لي كترفع المعنويات هادشي كامل قبل ما تمشي تضرب حتى قرطاسة وحدة فساحة المعركة لي كيمشي يهاجم بلا اقتصاد وبلا تنسيق كيخسر كلشي فدقيقة
ابتداء من غدا غادي نبدا ننشر ليكم دروس يومية من هاد الكتاب وغادي نسقطوها مباشرة على داكشي لي كنعيشوه فاللعبة غنتعلمو كيفاش نبنيو اقتصاد قوي يمول الحرب ديالنا وكيفاش نخدمو الدبلوماسية باش نقسمو الاعداء وكيفاش نستدرجو الخصم ونستنزفو الموارد ديالو
تسنونا فالمقال الجاي