السلام عليكم
أنا قررت أترشح عشان أكون جزء من الكونجرس بدون وعود شكلها حلو وخلاص لأن اللي يفرق فعلا مش الكلام… اللي يفرق هو الفعل والنيه وإن الشخص يبقى فاهم هو داخل ليه
أنا شايف إن المرحلة اللي جاية محتاجة ناس تكون واعية وبتفكر في مصلحة البلد قبل أي حاجة تانية مش محتاجين خلافات أكتر ولا ناس تدخل بس عشان تاخد مكان محتاجين حد يسمع يفهم ويشتغل حد يقدر يتعامل بعقل مع المواقف ويعرف إمتى يتكلم وإمتى يهدى وإزاي ياخد قرار يخدم البلد والناس اللي فيها
أنا مش داخل عشان أقول إني الأفضل ولا عشان أديكم صورة مثالية عن نفسي بالعكس أنا داخل وأنا عارف إن المسؤولية دي كبيرة وإن أي منصب زي ده لازم يبقى وراه شخص عنده استعداد يتحمل يسمع النقد ويتعلم ويصلح غلطه لو حصل وده بالنسبة لي أهم من أي لقب أو منصب
اللي يهمني فعلا هو إن يكون في تمثيل حقيقي للناس وإن صوت البلد يبقى مسموع وإن أي قرار يتاخد يكون فيه تفكير كويس ومصلحة واضحة أنا مؤمن إن القوة مش في إننا نختلف على كل حاجة، لكن في إننا نعرف نشتغل مع بعض رغم الاختلاف ومؤمن كمان إن أي نجاح حقيقي بيبدأ من الثقة ومن إن الناس تحس إن اللي قدامهم صادق مش بيمثل
أنا برشح نفسي عشان أحاول أكون إضافة مش عبء عشان أكون شخص يشتغل بضمير ويحط مجهود حقيقي ويكون قد الثقة لو الناس اختارتني ومش هقولكوا إن الطريق سهل لأنه أكيد مش سهل لكن اللي أقدر أوعدكم بيه إنني هبقى موجود وهبقى قريب من الناس، وهسمع وهتعامل بجدية وهحاول أطلع بأفضل نتيجة ممكنة
في النهاية أنا شايف إن البلد دي تستاهل ناس تبني وتجمع وتستاهل ناس يبقوا قد المسؤولية فعلا مش بس كلام على ورق ولو إديتوني ثقتكم هعتبرها أمانة كبيرة وهشتغل على قدها وأكثر