لفلي 25 وعندي 6 شركات لفل 6... هل اقلب حربي؟

ليش غيرت رأيي عند لفل 25 وصرت أفكر إني أقلب حربي

الفكرة ممكن تكون صحيحة وخاطئة بنفس الوقت، والموضوع بيعتمد بشكل كبير على وضع بلدك وعلى هدفك من التحول.

ليش ممكن تكون الفكرة خاطئة؟

لأنك لما توصل لفل 25، مهاراتك قليلة ورتبتك العسكرية ضعيفة، وبالتالي الـدمج تبعك رح يكون ضعيف جداً مقارنة بلاعب حربي عنده مهارات أكتر لان لفلو اعلى.

وبالنهاية، إذا إنت وهو رح تدفعوا نفس المبلغ على الأسلحة، هو رح يطلع دمج أضعاف اللي إنت بتطلعه.

فمثلاً، بدل ما تدفع 200 دهباية حتى تجيب دمج ما بيتجاوز نصف مليون، ممكن تستخدم نفس المبلغ بطريقة تخدم بلدك أكثر، متل التبرع للدولة لاستخدامه بعقد يحقق لها مليونين أو أكثر.

لهيك، إذا بلدك بحرب وبلدك فعلاً بحاجة لكل دمج ممكن تطلعه، برأيي التحول لحربي بهالمرحلة ممكن ما يكون الخيار الصحيح. الأفضل وقتها إنك تستخدم مواردك بالطريقة اللي تعطي بلدك أكبر فائدة ممكنة.

طيب ليش ممكن تكون صحيحة؟

لأن لاعب حربي فعلياً ما رح يحتاج أكثر من 6 شركات لفل 6 حتى يستفيد من الإنتاج، وإنت عندك أصلاً هالمؤهلات.

مشكلتك الأساسية هي الـلفل والرتبة العسكرية، مو الشركات.

فإذا بلدك مرتاح حالياً وما هو بحاجة إلك بالحرب، هون الموضوع بيختلف.

ممكن تستغل هالفترة حتى تقلب حربي وتبدأ تتدرب على النظام العسكري، وتتعلم كيف تلعب كحربي، وبنفس الوقت تبدأ ترفع رتبتك العسكرية، واللي برأيي من أهم الأشياء بحسابك بعد الـلفل.

وفوق كل هاد…

الحربي أمتع من الفلاحة 😂

فإذا البلد ما هي بحاجة ماسة إلك حالياً، وعندك 6 شركات لفل 6، ممكن يكون لفل 25 وقت مناسب لتبدأ تجرب الطريق العسكري بدل ما تضل مركز فقط على الاقتصاد.

الخلاصة

إذا بلدك بحرب وبدها منك أقصى إنتاج ممكن: خليك مزارع واستثمر مواردك بذكاء لخدمة البلد.

أما إذا بلدك مرتاحة وما هي بحاجة إلك حالياً، فعندك الأساس الاقتصادي، وعندك 6 شركات لفل 6، وبدك تتعلم الحرب وترفع رتبتك العسكرية: ليش لا؟ جرب تكون حربي.

اعمل بذكاء، وليس بجهد… فيد بلدك.